Kuma, kuma, ajme mene, nism ja niš jadita nate, još se mi je – tako po naše preloško - lepo vidlo, da si mi nevošljiva i da si ljubosumna name, sa mi dur nekaj očitaš kumeta (kume gore, kume dole …). Baš un dan je bila i puna luna, pa ti je morda nekulik naškodila.

Nego, pajša vera nijena, kaj ste to imale pri mleku un dan? Škoda kaj je moju krave preshlo mleko i nimam kaj nosit, da bi čula kaj novega, sa je smerum kaj za divanit. Ti se sigurno svetiš une štorije lane po letu, kad je grmelo. Drugo jutro (da te malo dosvetim) je prva donesla mleko Franca i rekla Katete, da je čera skoro pukla strela u njihovo staro hruško. Franca je prošla, Kate pa je brž prenesla vest Barete, da je čera puklo u Francino hruško. Bare je sstala Magdo i ju povedala, kako je čera puklo u hruško i skoro ubilo Franco, ki je bila blizu. Magda je brzo povedala najnovejo vest Marete, da je čera puklo u hruško i ubilo Franco. A Mare je sa prestrašena tekla povedat susede Anete:«Jo, jo, teta Ane, kakva nesreća! Čera je puklo u hruško i ubilo Franco i njejo mater!«

Pa kaj bi sda o tem! Dojdi ti rajša k mene u selo, ki ja baš sda žgem rakijo. Dojt će i kume. Veli, da nam ima nekaj jako važnega za povedat. Mene je samo nekaj nasekl, da sm bila cel dan jadita. Ajo mene, govoril je od nekega »črnega dela« i da mi nebu mogl već cepat drv i rezat tršća. Samo da znaš, nebu smel niti tebe pomagat. Nism ga dobro razumela, zakaj bu to tako. Rekl je samo, da so uni glavonje gore pogruntali neki novi zakon i da nebumo već smeli pomagat jeni drugem i da budo to črno delo kontrolirali neki ljudi, ki nas budo i štrafali. Jo, jo, kuma moja, slabo se nam piše. Kaj so uni gore prik obedasteli, kako bi nam mogli to napravit. Naj se uni sami med sobom nadzirado i štrafado, nas neka pustido pri miru, sa se dost mntramo za ta komadićk kruha.

Bolje, da ti ja to ne govorim, zakaj niš ne razumim. Dojdi ti lepo k mene, pa nam bu naš kume se razložil, un to se prati. Malo si bumo skupa popili i sami dokončali svoje zakone!

Čuješ, nu dojdi zaistino, pa mi buš i povedala, sol se une pregrete glave kaj ohladile.

                                                                                                    Tvoja kuma